மத்திய அரசின் புதிய 4 தொழிலாளர் சட்டங்கள் 2025 - ஒரு விரிவான பார்வை | Central Government's 4 New Labour Codes 2025 - A Comprehensive Overview

காலத்தின் மாற்றங்களையும் தேவைகளையும் உள்வாங்கிக்கொண்டு அதற்கேற்ப சட்ட திட்டங்களை உருவாக்கி இயங்கும் தேசமே வளர்ச்சியை நோக்கிப் பயணிக்கும். வளர்ந்த நாடுகள் பலவும் அப்படித்தான் தங்களை அவ்வப்போது மேம்படுத்திக் கொள்கின்றன. அமுதப் பெருங்காலத்தில் இருக்கும் இந்தியா அப்படியான அனுபவங்களை உள்வாங்கிக்கொண்டு பல்வேறு சீர்திருத்தங்களை செயல்படுத்தியே உலகின் நான்காவது பெரிய பொருளாதார நாடாக வளர்ந்துள்ளது. அப்படி ஒரு முற்போக்கு நடவடிக்கைதான் இதுவரை நடைமுறையில் இருந்த 29 மத்திய தொழிலாளர் சட்டங்களைத் தற்காலத்திற்கு பொருந்தும் வகையில் இணைத்து, எளிமைப்படுத்தி, அனைவரும் புரிந்துகொள்ளும் வகையில் உருவாக்கப்பட்டுள்ள நான்கு புதிய சட்டத் தொகுப்புகள்.

• தொழிலாளர் ஊதியச் சட்டம் 2019
• தொழில்துறை தொடர்புகள் சட்டம் 2020
• சமூகப் பாதுகாப்புச் சட்டம் 2020
• தொழில்முறைப் பாதுகாப்பு, சுகாதாரம் மற்றும் பணியிடச் சூழல் சட்டம் 2020

ஆகியவையே வரலாற்றுச் சிறப்புமிக்க அந்தச் சட்டங்கள்.

இந்தச் சட்டங்கள் கடந்த 29.11.2025 முதல் அமலுக்கு வந்துள்ளன. சுதந்திரத்திற்குப் பிறகு முற்றிலும் தொழிலாளர்களின் பக்கம் நின்று உருவாக்கப்பட்டுள்ள இந்த நான்கு சட்டங்களும் அவர்களின் உரிமைகளையும் நல்வாழ்வையும் உறுதிப்படுத்துகின்றன. இதற்கு முன் நடைமுறையில் இருந்த தொழிலாளர் சட்டங்கள் முரனாகவும், காலத்திற்கு பொருந்தாததாகவும், வேறுபட்ட கருத்தாக்கங்களைக் கொண்டதாகவும் இருந்தன. அவற்றின் நடைமுறைப்படுத்துவதிலும் பல்வேறு சிக்கல்கள் எழுந்தன. தற்போது உருவாக்கப்பட்டுள்ள சட்டத் தொகுப்புகளில் இந்தக் குறைகள் களையப்பட்டுள்ளன.

🤝 தொழிலாளர் நலன்கள் மற்றும் உரிமைகள்

• தொழிலாளர்கள் மற்றும் ஊழியர்களின் நலன்களை இந்தச் சட்டங்கள் உறுதி செய்கின்றன. அதே நேரம், நிறுவனங்களுக்கான சட்டபூர்வ கடமைகளை ஒழுங்கு செய்கின்றன.
• அனைத்துத் தொழிலாளர்களுக்கும் நிறுவனங்கள் பணி நியமனக் கடிதங்களை வழங்குவதை கட்டாயமாக்குகின்றன. எவ்வித பணி ஆணை இல்லாமல் தொழிலாளர்களிடம் வேலை வாங்குவது இதன் மூலம் தடுக்கப்பட்டுள்ளது.
• தற்போது வரை பல நிறுவனங்களில் நிரந்தரத் தொழிலாளர்கள், ஒப்பந்தத் தொழிலாளர்கள் என்ற பாகுபாடுகள் இருக்கின்றன. சம வேலையைச் செய்தாலும், ஒப்பந்தத் தொழிலாளர்களுக்குப் பணிப் பலன்கள் மிகவும் குறைவாகவே கிடைக்கின்றன. இதற்கு முன்பிருந்த சட்டங்கள் அந்த விஷயத்தில் கவனம் செலுத்தவில்லை.
• தற்போது இந்த புதிய சட்டத் தொகுப்புகள் அந்த விஷயத்தைத் தீவிரமாகக் கவனத்தில் கொண்டுள்ளன. நிரந்தரத் தொழிலாளர்களுக்கு நிகராக ஒப்பந்தத் தொழிலாளர்களுக்கும் விடுமுறை, மருத்துவம் மற்றும் சமூகப் பாதுகாப்பு வழங்கப்பட வேண்டும் என்று இந்தச் சட்டங்கள் உறுதி செய்கின்றன.
• 40 வயதுக்கு மேற்பட்ட தொழிலாளர்களுக்கு ஆண்டுதோறும் இலவச மருத்துவப் பரிசோதனை செய்வதை நிறுவனங்களின் பொறுப்பாக்குகிறது இந்தச் சட்டம்.
• நிரந்தரத் தொழிலாளர்களுக்கு மட்டுமே பெரும்பாலும் வருங்கால வைப்பு நிதி, மருத்துவக் காப்பீடு, தொழிலாளர் அரசு காப்பீட்டுக் கழகத்தில் உறுப்பினராகும் வாய்ப்பு வழங்கப்படுகிறது. ஒப்பந்தத் தொழிலாளர்களுக்கு அவை கிடைப்பதில்லை. இந்த புதிய சட்டங்கள் அந்தச் சலுகைகள் அனைத்தும் ஜிஐஜி வர்க்கர்ஸ் (Gig Workers), தற்காலிக ஒப்பந்தப் பணியாளர்கள் உட்பட அனைத்துத் தொழிலாளர்களுக்கும் கிடைக்க வழிவகை செய்கின்றன.
• இந்த நிறுவனங்களை நடத்துபவர்கள் தங்கள் ஆண்டு வருவாயில் ஒரு குறிப்பிட்ட சதவீதத்தைக் காப்பீடு மற்றும் சுகாதாரப் பலன்கள் போன்றவற்றுக்கான ஒரு பிரத்தியேக நிதியில் பங்களிக்க வேண்டும்.
• வருங்கால வைப்பு நிதி என்பது தொழிலாளர்களின் ஆகப்பெரிய நம்பிக்கை. பிள்ளைகளின் கல்வி, திருமணம், ஓய்வு காலத் திட்டமிடல் போன்றவற்றுக்கு அதையே பெரும்பாலும் தொழிலாளர்கள் நம்பி இருப்பார்கள். ஒப்பந்தத் தொழிலாளர்களுக்கு இதுவரை எட்டாமல் இருந்த இந்தச் சலுகைகள் இனி உறுதியாகும்.
• ஊழியர்கள் பணிபுரியும் நிறுவனத்திடமிருந்து கிராஜுவிட்டி எனப்படும் பணிக்கொடை பெறக் குறைந்தது 5 ஆண்டுகள் அந்த நிறுவனத்தில் பணிபுரிந்திருக்க வேண்டும் என்று விதி இருந்தது. இந்தச் சட்டத் தொகுப்பு அந்த விதியை திருத்தி இருக்கிறது. இனி ஓராண்டு காலம் பணியாற்றி இருந்தாலும் பணிக்கொடையைத் தொழிலாளருக்கு நிறுவனம் வழங்க வேண்டும்.

⏱️ பணி நேரம் மற்றும் ஊதியம்

• சிறு, குறு, நடுத்தர நிறுவனங்கள் சில தொழிலாளர்களை 9 மணி நேரம், 10 மணி நேரம் வேலை செய்ய நிர்பந்திப்பது வழக்கமாக இருக்கிறது. இனி அவ்வாறு வதைக்க முடியாது.
• தொழிலாளர்களை கூடுதல் நேரம் வேலை வாங்கினால் அவர்களுக்கு அதற்கான கூடுதல் ஊதியத்தை வழங்க வேண்டும். குறிப்பாக, சாதாரண வேலை நேரத்திற்கு மேல் பணிபுரியும் ஊழியர்களுக்கு அவர்களின் சாதாரண ஊதிய விகிதத்தை விட குறைந்தபட்சம் 2 மடங்கு ஊதியம் வழங்கப்பட வேண்டும்.
• ஆண்டுதோறும் ஊதியத்துடன் கூடிய விடுப்பு பெறுவதற்கான தகுதிக் காலம் ஒரு வருடத்தில் 240 நாட்கள் வேலை என்பதிலிருந்து 180 நாட்களாக குறைக்கப்பட்டுள்ளது. இதனால் புதிய ஊழியர்கள் விரைவில் விடுப்புப் பலன்களைப் பெற முடியும்.
• கடந்த 2017-ஆம் ஆண்டு குறைந்தபட்ச ஊதியம் ரூ. 18,000/- லிருந்து ரூ. 24,000/- ஆக திருத்தி அமைக்கப்பட்டது. இதனை அனைத்துத் தொழிலாளர்களுக்கும் உறுதிப்படுத்தும் வகையில் இந்தச் சட்டங்கள் அரவணைக்கின்றன.
• வீடு மற்றும் பணியிடத்திற்கு இடையிலான பயணத்தின்போது ஏற்படும் விபத்துகள், இனி வேலை தொடர்பான விபத்துகளாகக் கருதப்பட்டு இழப்பீடு அல்லது காப்பீட்டுச் சலுகை வழங்கப்படும்.
• நிறுவனங்களில் ஊழியர்களுக்குச் சம்பளம் வழங்கும் நாள் வெவ்வேறு விதமாக உள்ளது. குறிப்பிட்ட தருணத்தில் சம்பளம் கிடைக்காமல் ஊழியர்கள் சிரமத்திற்கு உள்ளாகிறார்கள். அதையும் புதிய சட்டத் தொகுப்பு கருத்தில் கொண்டிருக்கிறது. இனி ஐ.டி. துறை உள்ளிட்ட அனைத்துத் துறைகளிலும் பணியாற்றுபவர்களுக்கு ஒவ்வொரு மாதமும் 7-ஆம் தேதிக்குள் ஊதியத்தை வழங்க வேண்டும் என்று நிர்ணயம் செய்கின்றன புதிய சட்டங்கள்.

🚺 பெண்கள் பணி பாதுகாப்பு

• உலகமயமாக்களுக்குப் பிறகு வேலைகளின் தன்மை மாறிவிட்டது. ஆண்களுக்கு இணையாகப் பெண்களும் வேலைக்குச் செல்லத் தொடங்கிவிட்டார்கள். இரவுப் பணி என்பது பல துறைகளில் பெண்களுக்கு மறுக்கப்படும் நிலைதான் இருந்தது. புதிய சட்டம் பெண்கள் இரவுப் பணி செய்ய இருந்த கட்டுப்பாடுகளை நீக்கி உள்ளது. அவர்களின் ஒப்புதலுடன் அனைத்து இரவுப் பணிகளிலும் அவர்களைப் பணியமர்த்தலாம் என்றும் கூறப்பட்டுள்ளது.
• பெண்களுக்கு சம வாய்ப்பு, சம ஊதியம் வழங்கப்படுவதையும் இந்தச் சட்டங்கள் கட்டாயமாக்குகின்றன.

🏠 வீட்டிலிருந்து பணி (Work From Home) மற்றும் வேலை நிறுத்தம்

• கோவிட் பெருந்தொற்றின் தாக்கத்திற்குப் பிறகு வீட்டிலிருந்து பணியாற்றுவது தவிர்க்க முடியாததாகிவிட்டது. குறிப்பாக ஐ.டி. துறைகளில் அது முழுமையாகக் கடைப்பிடிக்கப்படுகிறது.
• தற்போதைய சட்டம் வீட்டிலிருந்து பணியாற்றுவதை அங்கீகரிக்கிறது. ஆயினும் இது நிறுவனத்திற்கும் ஊழியருக்கும் இடையிலான ஒத்திசைவான ஒப்பந்தத்தைப் பொறுத்து அமையும்.
• இனி ஊழியர் நியமனம், நிறுவனம் மற்றும் ஊழியருக்கிடையிலான நேரடி ஒப்பந்தத்தின் மூலம் மட்டுமே நடைபெற வேண்டும். புதிய சட்டங்களின்படி மூன்றாம் நபரின் தலையீடு தவிர்க்கப்படுகிறது.
• நிரந்தர ஊழியர்களுக்கு வழங்கப்படுவது போன்ற குறைந்தபட்ச வேலை நேரம், ஊதியம் போன்றவை ஒப்பந்த ஊழியர்களுக்கும் வழங்கப்பட வேண்டும்.
• வேலை நிறுத்த உரிமைகளையும் இந்தச் சட்டங்கள் நிலைநிறுத்துகின்றன. நிறுவனத்தில் 50%-திற்கும் அதிகமான ஊழியர்கள் ஒட்டுமொத்தமாக தற்செயல் விடுப்பு எடுத்தால், அது வேலை நிறுத்தமாகக் கருதப்படும் என்று வரையறுக்கப்படுகிறது.

💰 ஊதியம் மற்றும் சமூகப் பாதுகாப்பு பலன்கள்

• தற்போதைய சட்டங்கள், ஊதியம் என்பதற்கான வரையறையைத் தரப்படுத்துகின்றன. இதன்படி அடிப்படைச் சம்பளம் மொத்த ஊதியத்தில் குறைந்தபட்சம் 50% ஆக இருக்க வேண்டும்.
• இது சில ஊழியர்களின் உடனடி கையில் கிடைக்கும் சம்பளத்தைக் குறைக்கக் கூடும் என்றாலும், வருங்கால வைப்பு நிதி மற்றும் பணிக்கொடை போன்ற சமூகப் பாதுகாப்பு பலன்களுக்கான பங்களிப்பை அதிகரிக்கும். நீண்ட கால ஓய்வூதியப் பாதுகாப்பை மேம்படுத்தும்.

ஏற்கனவே நடைமுறையில் இருந்த பல்வேறு தொழிலாளர் சட்டங்கள் 1930-ஆம் ஆண்டு முதல் 1950-ஆம் ஆண்டு வரை இயற்றப்பட்டவையாக இருந்தன. அப்போது இருந்த நாட்டின் பொருளாதாரச் சூழல் மற்றும் உலகளாவிய தொழிலாளர்கள் சூழல் வேறு. இன்று இந்தியாவில் தொழில் வளர்ச்சி பன்மடங்கு பெருகிவிட்டது. உலகளாவிய பெரிய நிறுவனங்கள் பலவும் இந்தியாவில் தங்கள் தொழில்களை விரிவுபடுத்தியுள்ளன. அதனால் தொழிலாளர்களின் உரிமைகளையும் வாழ்வாதாரங்களையும் பாதுகாக்க வேண்டிய கடமை அரசுக்கு உருவாகி உள்ளது. அதன் காரணமாகவே இந்தத் தொழிலாளர் சட்டங்கள் உருவாக்கப்பட்டுள்ளன.

இந்த புதிய தொழிலாளர் சட்டங்கள் ஜி.எஸ்.டி. வரி சீர்திருத்தம் அமலுக்கு வந்த பின் நாட்டில் கொண்டுவரப்பட்டுள்ள மிகப் பெரிய சீர்திருத்தம் ஆகும். இந்த நடவடிக்கை இந்தியாவின் வணிகத்தை உலக சந்தையில் பெரிதும் உயர்த்தும் என்கிறார்கள் பொருளாதார நிபுணர்கள்.

சுயசார்பு இந்தியாவிற்கான தொழிலாளர் சீர்திருத்த நடவடிக்கையின் ஒரு பகுதியாக எதிர்காலத்திற்கு உகந்த வகையில் ஒழுங்குமுறை விதிகளை நவீனமயமாக்குவது, தொழிலாளர்களின் நலன்களை மேம்படுத்துவது, தொழிலாளர்களின் பணியிடச் சூழலைச் சீரமைப்பது போன்ற நடவடிக்கைகள் காலத்தின் தேவை. இந்திய மக்கள் தொகையில் 65% பேர் 35 வயதுக்குட்பட்டவர்கள். 50% பேர் 25 வயதுக்குட்பட்டவர்களாக இருக்கிறார்கள். இந்த வலிமை 2047-ல் நாம் வல்லரசாக மாறுவதற்கான சாத்தியங்களை அளிக்கிறது. இச்சூழ்நிலையில் தொழிலாளர் நலனுக்கான சீர்திருத்தங்கள் அவசியம். அதற்கேற்ப இந்த புதிய சட்டக் கட்டமைப்பு, பல தசாப்தங்களாகப் பழமையான, சிதறியுள்ள விதிகளை சுலபமாக்குகிறது. தொழிலாளர்களின் நலனை மேம்படுத்துகிறது. பாதுகாப்பு அம்சங்களை பலப்படுத்துகிறது. எளிய மக்களின் நல்வாழ்வை இலக்காகக் கொண்டு உருவாக்கப்பட்டுள்ள இந்தச் சட்டங்கள், இதுநாள் வரை இருந்த குழப்பமான முரண்களை நீக்கி, முழுக்க முழுக்க மக்களின் நலனை நிரூபிக்கின்றன.